عرض مشاركة واحدة
قديم 10-26-2008, 02:20 AM   رقم المشاركة : [4]
فيونكـــهـ ورديـــهـ
:: لها صوت مسموع بالعامة ::

 الصورة الرمزية فيونكـــهـ ورديـــهـ
 





 

مركز رفع الصور والملفات

افتراضي رد: سعودي وزوجته زاروا الكويت لأول مره هذا انطباعهم مع الصور

نرجع مره ثانيه لجولتنا المسائيه وقبل لا اتكلم عن الجوله المسائيه رايح اعلق في بعض النقاط على منطقة المارينا ( السوق والمطاعم وحتى الفندق ) وهي بصراحه للي مازار الكويت ممتعه جدا رغم صغر المساحه المخصصه..بس تتميزهالمنطقه بإنها منطقة حركه ووناسه وعالم رايحه وجايه وقعدات وقهاوي والبحر قبالك والناس مالهم دعوى فيك وكلن يبتسم لك (يمكن لاني فاتح كشرتي وأبتسم لكل الي يقابلني ) والصراحه انا عجبتني هالمنطقه وخصوصا الجلسات الخارجيه والمرسى وحتى السوق والسينما ... وأيضا يميز هالمنطقه قربها من شارع السالميه (( أعتقد إذا ما خانتني الذاكره اسمه شارع مبارك )) وهو خلف سوق المارينا وفيه مطعم شكله حلو وشعبي اسمه فريج صويلح على اسم التمثيليه الكويتيه الشعبيه

(( بصراحه ما دخلته بس ناوي في الزياره الثانيه للكويت أدخله))






(على اليمين اتلاقون المطاعم والقهاوي وبعض المحلات وعلى اليسار تلاقون مبنىي اسمه مجمع الفنار راح تشوفونه بعدين )

وشارع السالميه هذا شارع طويل كله محلات تجاريه مختلفه (( يشبه شارع الثميري عندنا في الرياض))بس انه اطول واكثر تنوع..والكلام يطول حول منطقة السالميه ستكتشفونها اثناء زيارتكم للكويت ان شاء الله ..نعود للجوله المسائيه والتي بدأت حوالي خمس بالتوجه الى سوق رائع رائع من وجهة نظري كتاجر
ملابس نسائيه وفيه تنوع جميل لمحلات الأزياء كما وجدنا فيه بغيتنا (( الماركات الكويتيه )) وهو سوق (( المهلب))












والسوق يتكون من دورين إضافه للدور الأرضي وهو على شكل سفينه ويتميز بسهولة التنقل بين المحلات وتنوع محلات الألبسه فيه ....و .....
مجمع المهلب بصراحه عجبني جدا بسبب سهولة التسوق وكذلك تنوع محلات الأزياء وخصوصا كما ذكرت (( الماركات الكويتيه )) وفعلا أخذنا في التجول داخل المجمع ودخول هذه المحلات واحد واحد دون كلل او ملل !!و زوجتي طبعا مستانسه وفي قمة السعاده ولو تبينا نقعد ثلاثة ايام في السوق أضن ماعندها مانع (( ترى أسعد لحظات المره أنها تقعد تدور في سوق أول مره تدخله )) وطبعا يتخلل الدوران مهوب أقل من ثلاث اربع بلايز وتنورتين وكم بنطلون على كم بدي .... وطبعا انا ما أقدر أعارض لأني قايل لها في الرياض اننا رايحين نشوف الموديلات بالكويت والي يعجبك هناك خذيه لك (( عينه ))
واذا صار حلو في اللبس طبقنا موديله للمحلات !! وطبعا هي ...ترددت بالموافقه ( إيه هين تتردد) !! ويوم قعدت أحايل فيها قالت لي ...يا كثر طلباتك ... خلاص موافقه !!!
ترى عشان العشره الي بينا بوافق !!!المهم مع الدوران وسعة الصدر بها السوق مادرينا عن الوقت الا الساعه 7مساءا عند آخر محل وقفنا عنده وكان حواري مع البائع في المحل عن الأسعار المبالغ فيها لبعض الملابس (( خصوصا ان تكلفتها قليله قياسا على الأسعار)) فكان جوابه ان هذه مستوى اسعار الماركات وانهم لو نزلوا بالسعر فقدت ماركتهم تقدير المستهلك لها !!!!!! تبون الصراحه كانت إجابته مقنعه نوعا ما لي .. خصوصا اني اعرف نفسيات بعض الحريم
على العموم تركنا المهلب في السابعه والنصف وتوجهنا لسوق آخر في منطقة حولي وهو(( مجمع العثمان )) والمجمع هذا ليس بالفخامه التي تتميز بها الأسواق التي مريت عليها قبل ... بس فيه ميزه انه اقل سعرا من سابقيه.. والسوق لا يحتاج لأكثر من نصف ساعه دوران ... شرينا منه ايضا كم بلوزه (( شغل الكويت )) وطلعنا من المجمع العثمان وتجهنا بإتجاه شارع السالميه ...بس طلبنا من التكسي نمر الفندق 5دقايق ننزل اكياسنا الي معنى (( الي يشوفنا يقول هذولي قاعدين يجهزون عروس )) على فكره قلت لمرتي هالجمله... قعدت تميلح علي !! (كذبت كذبه وصدقتها) وقامت تسوي نفسها عروس !!منزله راسها بالأرض وما ترد علي اذا ناديتها من الحيا !!!وعشان تضبط الدور عطت العامل الي طلع الأكياس فوق 10 دنانير اكراميه !!!!!بصراحه انا ولعت ...قسم مهوب بخل والله بس10 دنانير صراحه كثير ... انا كنت مجهز دينار بجيبي عشان اعطيه إذا نزل ... والله وتسبقني له بنت حاتم الطائي وتعطيه الفلوس.... قلت لها خير ان شاء الله يا بنت عدنان خاشقجي !!...وش سوى هو عشان تعطينه هالمبلغ ؟؟؟قالت لي انا بصراحه نسيت ان الدينار بأكثر من 13 ريال !! قلت طيب لا تلقفين وتحاسبين أحد مره ثانيه !!!

رحنا بعد ذلك لشارع السالميه الي هو خلف سوق المارينا ...وبدينا فيه من اوله طبعا مشي و من فضل الله علينا اننا مانمل من المشي ونعتبره احد فوائد السفر(احيانا ينزل وزني من 2- 3كيلو بعد اي سفره)فائده مهمه للمساعده على المشي وعدم التعب (( يجب ان تختار وتختارين نوعيه حذاء رياضيه مناسبه للمشي وستلاحظون الفرق))المهم استانسنا بها الشارع وقعدنا نتمشى ونطالع بها المحلات(بدون شراء)!! وأستغرق ذلك حوالي ساعه ونص احسسنا بعدها بحاجتنا لأستراحه !!! توجهنا فيها الى مجمع مطاعم مرسى المارينا وتحديدا الى الفرايديز










وهذا الرابط فيه صور حلوه عن المارينا دخلوه وشوفوه

(يقع في الدورالثاني وهو مقابلالبحر وله اطلاله جميله على المرسى),حيث أكلنا وتقهوينا و ريحنا لمدة حوالي ساعه كامله توجهنا بعدها الى سينما المارينا ( أقدر شيء اسمه سينما ) وذلك
لحظور الفيلم الي حجزنا عليه ...وطبعا ما خلص الفيلم الى الساعه وحده ... بعده قالت لي مرتي وش رايك ناخذ لنا راسين معسل عند خويك المصري !!!قلت أقول أها بس انثبري يا مره.....أشوفك تأثرتي بأجواء الحريه والديموقراطيه وحقوق المرأه في الكويت !!! وشكلك ناويه تسوين تمرد وأضراب !! لكن أعقلي وأبلعي العافيه !! بلا شيشه بلا معسل بلا خرابيط ..... حدك كوكتيل عصير بدون منجا ويخب بعد !!وفعلا رحنا للمقهى الي كنا فيه امس ... وأول ما شافني صاحبي المصري قال لي مش قلت لك حترجع تاني !!! بصراحه انا خفت لا يكون حاط لي شيء في المعسل الي البارح <<< متأثر بالمسلسلات ... عشان كذا طلبنا بس شاهي ومويه ..بس ...جلسنا في المقهى لين الساعه ثنتين وبعدها توجهنا للفندق للنوم بعد ما انهكنا الدوران بها السوقه طول اليوم قمنا اليوم الثاني (آخر يوم لنابالكويت )وسوينا تشيك اوت من الهوتيل الي للأسف اننا ما استمتعنا بمرافقه وحتى ما دخلنا المسبح حقه ( رغم شكله الجميل الي وريتكم في الصوره!!!)لكن بسبب قصر المده ما دخلته!!! المهم حطينا اغراضنا وشنطنا عند الأستقبال حق الفندق و توجهنا مباشره الى مدينة الألعاب المائيه المسماه (اكوا بارك )















وهي تقع بجانب ابراج الكويت ويوجد بها عدد من الألعاب المائيه والمسابح وكذلك يوجد بها عدد من المطاعم والبوفيهات كما ان لها شاطيء
رملي على الخليج العربي ( انصح بزيارتها خصوصا الي معهم اطفال ) كما انصحهم بزيارة ( المدينه الترفيهيه




من مواضيع فيونكـــهـ ورديـــهـ
فيونكـــهـ ورديـــهـ غير متواجد حالياً   رد مع اقتباس